Hosted by
About event
to be add ..
Mapping Memories
2 contributors | 59 places
Reviving Grounds is an interactive map showing places of cultural significance from local inhabitants in Ilulissat. The stories connect memory, landscape, and climate change and are part of a forthcoming exhibit at the Ilulissat icefjord center.
Piniarneq
Aasakkut piniangassat assigiingittut piniartarpagut, soorlu puisit niisallu. Qerititsivimmut toqqortarpagut ukiumut qaqillattaagassanngorlugit. Niisaap mattai nalliuttorsiornermi qaqinnerusarpagut. Ulluinnarlugu piffimmiittarpugut. Taqussat imeruersaatillu pingaartittuaannarpagut, umiatsiami sikkerhedsudtyriuteqareeratta. Ilaquttakkalu angalakkajuppunga, ilaannikkut aappara ilangisarlugu. Piffik uannut isumaqarujussuartarpoq, angalangaatsiarsimatillunga tarnigissutut misigisarama.
Qajaasartarfik
Tikillugu qajaasalissuaq. Aasakkut umiatsiatsinnik gummibådelerluta ornittarparput. 1,5 tiimi missaa taakunnartarpugut, utimullu puisinniaqqaartarpugut. Assatsinnik pilutaajartarpagut, puussaanut iliorarlugit. Panertittarpagut ukioq naallugu tiinut nerisassanullu atortarpangut. Pilutartaasa milliartorneri silap allanngoriartorneranut takussutissatut taasinnaavakka. Bagepapir-mut siaartillugit stuetemperaturimiitillugit panertittarpagut.
Pilineq
Pujoorisarpugut najoraagatsigu, aasaanerani julip naaneraniit august ilanngutilaarlugu najortarparput. Eqaluit pujoortarpagut, apeqqutaallutik angissussai ullut pingasut pilisinnaasarpugut. Nammineq qassersoriarluta taratsersoriarlugit pujoorlugit. Ilaqutariiulluta umiatsitsinnik taakunga angalasarpugut. Taqussat, imeruersaatillu apeqqutaallutik atisassamaatit nassareerlungit unnuiniarnerluta aalajangertarparput. Pilisagut ukiumut toqqortariasarpagut nalliuttunilu pilliuteqartarluta.
Arpaffik
Upernariartorneraniit arpattarpunga, soraareernerma kingornaanerusoq arpattarpunga ullaakkuunngitsoq. Tyggegummiuteqartuaannarpunga qilannaveeqqutitut. Pingaaruteqartutut aqqut taasinnaanngilara allanik periarfissaqarmat. Kisianni biilikittarnera iluartaqaaq inukisaartarmat. Kisima arpattarpunga. Aqquserngit kiviartorput, ukiummi tamaasa immaqa asfaldterisarput. Aqquserngit kiviartorneri sukkasarnermik takanani. Takorloorsinnaavara siunissami sukkanerusumik aqqusineq kiviartussasoq.
Blå rute
Aasakkut pisuttuarfingisarpara sukkalaartumik pisuffigalugu. Aasakkuinnaq pisuffigisarpara. Ilangisaqartuaannarpunga ersilaartarama. Imeruersaatinik tamussiussassamininnguanillu nassartarpunga. Qoororsuarmiit aallartittarpunga, isikkivia nuannarisarakku nuiartorlugu. Pilluarnarersuaartarpara, takusinnaasarakku qanoq pinngortitarput kusanartiginersoq. Sermermiukkut utertarpunga. Isikkivimmut nuiartornermi maluginiarnikuuara iluliarsuit pukkiliartuinnartut.
Akinnaq
Februar-April akinnamukartarpunga qasujaallisarlunga. Siumut utimullu 2 tiimit missaaniittarput. Ilangisaqarnerusarpunga, imeruersaat chokoladebailu nassartarpakka. Uannut pingaaruteqarpoq pinngortitamiinneq illoqarfimmiiginnarani silaannarissumiilluni. Maluginikuuara aputilliartuinnavinnera. Akulikittumik taakunnarsinaasarpunga, aamma sila apeqqutaatilaartarpara. Silagissimatillugu qimusserpassuit naapitassaasarput, inuit aamma pisuttuarfingisaramikku naapitassaqartuaannarpoq.
Qaarsorsuaq
Meeraallutali Qeqertaliaraangatta saneqquttangarput, kingornatingullu takornarialerisuungallarama Eqiliaassitillunga saneqquttangara. Qaarsorsuaq sivingasoq, ersarissumik ujaqqanik nakkaaviusarneranik takussutissalik, Meeraallunga malunginiartarnikuunngilara nakkaasoqarsimanersoq. Inersimasunngoramali nakkaasoqarnerata kinguneranik pujoq marloriarlunga naammattoorpara. Niuffingissallungu nangiarnartuuvoq, nakkaaratarsinnaanera eqqarsaatinniittarmat aammalu nunat sisoortut tusarsaanerummata.
Katersungaasivik
Iluliarmiut tamarmik orninnikuungunarpaat. Uannut isumalerujuuvoq, ilaatigummi silataaniippoq umiaq aanama sanaqataaffiginikuusaa. Takornarialerinermik suliaqarama ornikulavara, ilaanni iseqateqarlunga ilaannilu ilisimasakka inissilaarniarlungit. Illoq isumaqarluartoq ajoraluartumik kiviartortoq, nunap qeriuaannartup kingunerisaanik. Toqqavia qulloorpoq, illuarannguarlu sanianiittoq equlluinnarsimalluni. Iserluni malunnartarpoq natia equngasoq.
Minnerup aqqutaa
Aqqusineq uannut isumalerujuk, tassami aataqqiima Minnerup atsiunneqarfia. Illoqarfik mikisunnguummat aqqutissallu amerlanatik, tassuunaakkajuttorujussuuvunga. Ilulissani aqqusinerni immaqa akisunersaavoq. Ukiummi tamangajalluinnaasa asfaltimik manissarneqartarpoq, imaaliallakkaangamili mallertutullusooq ilusineqqittarpoq. Masarloqarfiuvoq kloakkillu imertaat taseqqertitsikkajuppoq.
Narsarsuaq
Narsarsuaq kialluunniit ukiuutillugu aqqutiginikuuaa, qimussit aallartarfiat aammalu ukiukkut pisuttuartarfik nalinginnaanerpaaq. Ukiukkuunerusoq aqqusaartarpara. Ukiunili kingullerni malunginiarsimavara pisuffissaasartoq allaat. Meeraangallarattami taserasaarnerunikuummat gummeqarnissaq pisariaqartuaannarsimavoq. Ukiuni qanittuni kamiinnaqarlunga naangakku tupingusunnikuuvunga.
Kingittoq
Takornarialerisuungallarama aqqutingiuaannarnikuuara, meeraallungali aqqutingisarpara. Orninnissaanut sila apeqqutaasarpoq. Aasakkuunerusoq ornittarpara, piffik taanna pingaaruteqartuummat. Anaananga Illumiormiuungami oqaluttuuttarpaanga sumi pinnguartarsimanerlutik. Massakkut nunap qeriuaannartup aakkiartornerani inutoqqat piniutingisimasaat namminneerlutik nunap iluaniit qummut puttussuutilernikuupput.
Utoqqaat pisinnaanerusut inaat
Taassuma nalaani meeraallunga illuinnannguaq piiartilluni utoqqaat pisinnaanerusut ineqarfiliuunneqarmata, paasivarput aanama nuuffissaringaa. Initaaqqaarami ajunngilaq, ilaqutattali maluginiaqqaarnikuuaat nateq equjartortoq, nunap qerijuaannartup aakkiartornerisa kingunerisaaanik. 1990-kkut missaani piareernikuupput. Ukiut 18-nik atoreerlutik najungaqarfingineqarsinnaajunnaarmata inuerupput. Eqqaaniittoq arsaattarfeeraq malunnartumik aamma itersertiterpoq.
Aqqusineq
Aqqusinermut piujuaannartitsineq eqqarsaatigalugu asfaltilersuineq pisarpoq, aqqusineq taanna malissiorfittutullusooq ittumik kiviartorami. Meeraangallaramali massakkumut, kiisa 42-nik ukioqalerpunga, suli taamarujuk ajortingaaq aqqusineq. Qallerneqaqqittuaannaraluarpoq iluarsivissinnaanili.
Angerlarsimaffinga
1998-imi illutaarivarput, anaanamalu illutaareqqaarpaa. Angerlarsimaffingiuaannarpara nuukkaluaraangattaluunniit. Kateriffingisarparput, kinguuariit anaananniit ataatsimuualaarneq atortorujuullutingut. Illorput uannut isumalerujuuvoq, nipaattuugami eqqissisimasuulluni. Nuna qerijuaannartoq eqqartornerani illup eqqaaniittoq taseq masarluusartoq, malunnarpoq massakkut annikilliartortoq. Tatsip nalaa malunnartarpoq kiviartortoq. Siornatigut narlorinnikoq massakkut iterserujussimavoq.
Nunianneq
Augustip qeqqata missaaniit september tungaanukanneq paarnanik kingutaarnanillu nuniakkajuppunga. Siullermi kisimiittarnikuuvunga, ilaannikkut ajaaragalu. Sila apeqqutaatinnangu assakka atorlungit nuniakkusuttarpunga puussiaaraq immerlungu. Ukiukkut qaqillattaangassanik nuniaanik pilisarpunga. Paarnartarneq isumalerujuuvoq, terapi nipaassuarmi, avatangiiseqarluni kusanartumi. Nerlerit, timmiaaqqat qanimut takusassaapput aammalu pusinik qinaasilaarluni. Illoqarfimmi pisut puujulaarlugit.
Taseraasat
Angajoqqaamma illuaraq tuniniarneqartoq pisiarinikuuaat. Upernaakkut weekendini, aasakkut sukkulluunniit feriarfingisarparput. Illuaqqami pisartut assingiinngittorpassuupput. Mobileqanngilagut. Sammisassat assingiinngittut silami pisarput. Ammassannik panertitsisarpugut, sissamii uillut tingoorartarpagut. Ilaquttallu siaasaasarpungut sissamilu naloraartarluta. Amerlalluta peqatigiittarpugut. Pisangut ingaassanngorlugit toqqortarnikuuangut. Nammineq pujuuineq tassani ilikkarpara.
Sisorartarnerup silarsuaa
Issippallaannginnerani issereerluni aput toreeraangat sisarfiusarpoq. Piumassuseq aallaaviulluni aallartittarpoq februarimiukkajuppoq. ISP tassani naapittarnikuupput, 1989-mi ilaaqqaarnikuuvunga. Angajoqqaakka siulersuisunut ilaasortaapput qatanngutikkalu sisorartartuullutik. Ikioqatigiinnerujussuaq taamani malunnartarpoq ullumikkumut sanilliullugu. Arfininngornikkut ullaakkumiit ullukkumut tappaviittarpugut. Akuleriit peqataasarput. Inuuninnut piffik isumalerujuuvoq.
Ilinniarnertuunngorfiga
Katillungu ukiut tallimat missai Qaqortumi GU-rnikuuvunga. 2020-mi Aasianni aallartikkaluarsinnarlunga Qaqortumut nuunnikuuvunga. Bærbarip nassarnissaa pingaaartittuaannarpara. 2025-mi ilinniarnertuunngorpunga. Uannut pingaarutilerujuuvoq Qaqortoq, siunissamummi ammaassisuuvoq. Atuarfiup eqqaaniipput ujaqqat ilerrillu. Takuneqarsinnaapput ilerrit morsukkiartuinnaavittut.
Pernaqqaarfiga
Atuanngiffeqarnerup nalaani angajoqqaakkalu puisinniarnirtarnikuuvugut nammineq umiatsiakutsinnik. Sivisuumik angalasinnaasarpugut nalunaaqutaq kaajallapajaarlungu. Puisit kisiisa piniartarpagut nammineq aallaasitsinnik. Sikup qaavanut illuaqqaluunniit ataanut pilakkiartarpugut. Amia niaqualu qimaannartarpagut. Sassumap arnaanut qujaniarluta puisip suaa immamut ingittarparput. Puisimik nutaartuuttarpugut, aammali toqqorsisarpugut ulluni nalliuttuni nerisassatsinnik.
Akinnaq
Qaqeqqaarpara qimussinik, takorluukkallu siunissamut eqqarsaatit puttussuupput. Ilulissat illoqarfianiik Akinnaq qaqinissaanut 30 minutsit missiliorpai. Qimusserneq kinaassutsitsinnut ilaavoq. Ukiuunerani aputeqartilluartillugu Akinnaq orninneqarsinnaavoq. Qimusseriaaseq assingiingittutitgut atorsinnaasoq paasivara. Soorlu qimusserluni piniariartoqarsinnaasoq qimussiinnanngikkaluarluni.
Aavarneq
Tuttut piniarneqarsinnaaleraangata Nassuttooq ornittarparput. Ilulissaniit nassuttuumut ullut pingasut angalasarpungut unnuinerit ilanngullugit. Nassartarpugut atortut assingiinngittut. Piniartarpangummi tuttut, umimmaat, ukallit teriannissallu. Tuttuli pingaarnerpaatittarparput. Ukallinik takungaatta pisaqartarpungut nerisassatsinnik. Tuttut aattoreeraangatsingit nammallugit isorartoorujuusinnaasumik assartortarpagut. Ullaamiik unnummut uetrluta apuunniartarpungut, soorlu nal. 7:00 - 22:00
Illuararput
Aanama aatamalu illuarakorivaat Hansennikkut qitornaasa kingornussaat. Aasakkut taakunnarnerusarpunga inuiattut ullorsiornitsinni. Aamma pilattarfingisarparput. Ilaqutattat umiatsiaat atorlugit taakunnakkajuppungut. Suliagut assingiinngillat, inukkerisarisarpugut silamilu sammisaqartarluta gummibåd-imilluunniit sukkanniuulluta. Uannut kinaassutsinnut pingaartorujuuvoq, aalisartut piniartut akorngani peroriartornikuungama.
Kisartarfik / Ulussat
Piffik taanna ateqarpoq Ulussat, Qanga ulussanik aallerfiusarsimassasoq pasittaattarpara. Piffiimmi tamarmik atserneqartarput. Torsukattak aasakkut juli-/augustimi ornittarparput, ukiivingisarparpullu imaangaangat decemberip tungaanut. Ukiummi kingulliit sikussaartalernikuungami assullu silap pissusaa allanngorarluni. Ullut tallimat angalasinnaasarpugut qaleralinniarluta. Ilaannikkut ullut amerlanerit taakaniissinnaasarpugut. 6-7tiimi ornerusaarsinnaasarparput, aqquterpulli apeqqutaasarpoq.
Jope
Qaatuupparput pisiniarfik immikkuullarissoq. Meeraallunga qaqortulianngersuungama pisiniarfingikulaartarparput. 2000 aallartinnerani nutartinngikkallarami pukkittukujuunnguuvoq. Nutaajungami natia narlorsimassooq. Inuusuttunngoriartorninni natia ueriartuaarnikuuvoq. Iluani ammukajaakkoorneq/qummukajaakkoorneq pisullunga misingissuseq pingisarpara. Natia taamaakkaluartoq ukiorpaalunni ammaannaavinnikuuvoq. Jope nutarterneqarmat allineqarmallu aaqqittuuseqqeriarluni illutaa equjartoqqilernikuuvoq
Atersuarnut aqqusineq
Inuit amerlanerpaat sungiusimasarpaat manissutut eqqarsaatingineqarsinnaasoq, maanili aqqusinerpassuit nutaamik asfaldtileraluarlugit piffissap ingerlanerani manikkunnaartarput itersanitsitertarlutillu. Immaqa taakkuukkajupput nuna qeriuaannartup aakkiartornerisa kingunerisaanik aakkiartortut. Kioskeqarnikuuvoq piffimmi tassani, natia malunnartumik uingalaarnikuuvoq nuna qerijuaannartumi toqqaveqarami. 2009-mi ammanikuuvoq, sivisorujunngittumillu ammanikuullutik.
Katersungaasivik
Qaqutikkut isertarpara, ullaakkulli saneqquttuaannarpara suliartoraangama. Tusaqqaarakkuli nuna qeriuaannartoq aakkiartortoq, eqqarsartarpunga susoqassuamita. Katersungaasiviup tunngavia qaarsuunani narsaamaniungami, upernaakkut marranngortarlunilu tasinngortarami. Katersungaasiviup saninnguaniittoq illuaqqap nunataa aakkiartornerata kingunerisaanik kiviartorpoq. Kalaallit Nunaata ernera Knud Rasmussen angajoqqaavisalu illorimmassuk pingaaruteqarpoq. Katersungarpassuillu takananiillutik.
Talittarfik
Sila apeqqutaatillugu suliartortarpunga, sila atorsaagaangat ullaakkut avalattarpugut. Ukiukkut qaamaneq apeqqutaasarpoq. Avalattarpugut ningittakkersoriarluta. Suliartornermi savik ukusartoq pingaartitarisarpara nassassallugu, ileqquummat amoriaannarmik saveqarneq. Qassutinik ningitsinermi ilaannikkut uloriarnarsinnaasarami, taamaammat pingaaruteqarpoq savimmik misilittagaqarnissaq. Silaannaap allanngoriartornerata kingunerisaanik immap tarajuusup qaava imiunerulersimavoq.
Avatangiisera
Uanga atuartuutikkalu najortarparput, ataasinngornermiit tallimanngornermut. December - januar suliartortarpugut, aasarsiuserluta sila aputeqanngingaarmat, isseqarani kiattarami. Kingumut qiviassagaanni januar 2009-mi seqinniarfiup nalaani puujorneq ajoringa -30 missaaniittartoq. Suna tamarmi aputaasoq. Aput amingaatinginartorujuuvoq, timitta sungiusimasaa silaannaq issittoq aputilik silaannarittoq. Avatangiisitsinnut peqqinnartoq. Inuuniutitsinnut eqquivoq, sikumi aalisartitsisaratta.
Suliartortarfinga
Ullaat tamaasa tamaana suliartoraangama soraaraangamalu aqqutingisuaannarpara. Ukiut tamaasa aqqusineq aaqqinneqartuaannartariaqartoq aqqutingisartagara. Eqqarsaatit pingisarpakka "qassinimmita qaleriippa?" Aasakkut ajorseriartuaannarami. Allat aamma aqquserngit malunnartaqaat, ingammik AJB ataatigoorluni malissiornartaqaat. Aqquserngit qeriuaannartumi aakkiartorneri sukkapput. Biilinut sunniuteqartarpoq peqqinnanngittumik. Siunissami allakkut aqquserngiortoqarsinnaangaluarpoq.
Nunianneq
Siullermik illoqutigiit ornittarparput, ilaqutarriippassuusarpugullu. Ulluinnartarparput. Augustimi nuniakkiartarpugut. Kalaalimerngit siaasangassat, qilaluamineq, puisip neqaa nassarsinnaasarpagut. Saarullinnianngikkaangatta. Paarnanik katerserujuttarama pingaartittarpara paarnaateqarluarnissarput. Nalliuttuni atortarpakka. Naasunik qajaasanillu katersisarpunga. Nammineq orpiliortaratta paarnaqutinik ilanngussisarpugut. Nunap qerijuaannartumut allannguuteqarsimaneranut eqqaasassaqanngilanga.
Isikkivik
Meeraaffiginikuuara, ukiut pingasuinnaat najornikuuara ilaqutaqarfingalugulu. Eqqaamasarpara angerlarserfingiuaannarlugu. Orninneqartorujuusarpoq isikkivik, suna tamarmi sikusarami. Piffiit annerpaartaani sikumiissinnaasarpungut sammisaqarluta. Sikup quppaatigut aalisariarnerit qaleralinniartarnerillu. Uanga ataataga, anaanaga, aqqaluaralu nunaqqatigullu ilangisarpakka. Ukiut 30-it takunikuunangu maajimi takoqqikkakku, sikuusaraluarami sikuunngilaq. Nukinnik aallerfigisarpara.
Najugaqarfinga
Ilaqutariittut toqqissisimaffipput. Piffik annerpaartaa ukiuunerani angerlarsimaffigivara, isikkivigissoq, avammut ammasoq. Isikkivik uannut pingaartuuvoq, peroramali isikkivilimmiittarama pingaartitaraara. 80-90´kkunni peroriartorninni imaq sikusarnikuuvoq. Meeraanitsinni sikumut aqqarluta pisuttuarnikuuvugut ilaquttat qanigisat ilangalugit. Ullumikkut misigineq ajorpakka misiginikuusakka, imaq sikussaarnikuugami.
Illuaraqarfipput takornariaqarfiusoq
Aasakkuinnaq tikittarparput, takornariarpassuit ulluinnaq angallallugit aammalu ilaqutariittullu angalaffigisarlugu. Nammineq pisatsinnik kalaaliminernik nerisittarput. Inooriaaserput takornarissanut paasikkusuttarparput. Nammineq umiatsiatsinnik illuaraq ornittarparput. Illuaraq pingaarteqaarput. Naajarpassuaqartalernikuummat piliffinginissaanut ajoqutigisalernikuuagut nerisaramikkit, ammassappassuit siornatigut panertittarnikuuagut. Sila aamma siallernerulernikuunermik anorlernerullunilu.
Seqinniarfik
Sumiiffik nuannarisara, iluliarsuit nikerarneri takusinnaallugit. Ukioq kaajallallugu Seqinniarfimmukarsinnaasarpunga. Misingissuseq pisartagara oqaasertaleruminaappoq, nipaassuaq, iluliarsuit nikikkiartorneri tusaasinnaallugit pinngortitamiilluni. Pisuttuaraangatta ulluinnartarpugut. Ungasinngisaani naluttarfeqarpoq atorneqarsinnaasumik, sila kiatsillugu ornittarparput. Iluliarsuit portusuut qangatuut takussaajunnaarnikuupput.
Happy place
Qullissaneersumik ilaqutaqarpunga, tassaasoq aanaanga. Umiatsiatsinnik tikittarpara. Ukiorpassuit tikinnikuunangu 2022-mi tikeqqippara. Misingissuseqarnaqaaq. Aanamma illua ersigunnaareernikuuvoq tassaarsuup immamut sisutinnikuugamiuk. Aanaqqiikkuma illuat suli ajunngilaq. Ukiut tamaasa julimi tikittalernikuuarput, pisuttuartaqaagut takornariartarlutalu. Qimmeqanngimmat meeqqat toqqissillutik aneertarput. Nunap qerijuaannartup aakkiartornerata kinguneranik qaqqat sisunikut takussaasarput.
Aavarfik
Arlaleria aavariarfiginikuuara. Ilulissaniit 10 tiimi missaani umiatsiatsinnik angalasarpugut. Kingullermik tuttut 17-t pisarivagut. Ilaquttakka ilagisarpakka, unnuisarluta sap. ak. ataaseq. Tuttutortaqaangut. Ilulissanut apuukkaangatta tuttup neqaa aaqqissuuttarpagut, siatassaliaralugit, suppiliassat allallu. Angajunniit ilikkarnikuuara qanoq tuttut aattorneqartarnersut. Ukioq kaajallallugu neqaateqarnissaq pingaartittarpara. Niaqqumik angerlaassinikuuvunga assiliassannik.
Eqi
Eqimi kooqarpoq mamartumik minguittumillu aallerfigisartatsinnik. Kammakkalu ilaquttallu puisinniartarfipput. Sermersuaq avannarleq kujallerlu ataatsikkut takuneqarsinnaapput. Ataatanga takornarialerisuugallarmat angalaqatigisarnikooqaara aasakkut. Aasaanerani ulluinnarlugu angalanerusarpugut. Qatanngutikka ilagigaangakkit unnuikkajuttarpugut, ilaannikkut ullut marlorsinnaasarluta. Meeraangallaratta sermersuaq angineruvoq, massakkut qeqertaq mikisoq sermersuup eqqaaniittoq nuinikuulluni.
Snescooter tur
Aattartoq meeraangallaramali ataatangalu qatanngutikkalu tikittarnikuuarput. Sermersuaq anginerujuunikuuvoq siornatiguminngaanniit sanilliullugu. Aqisserniartarfiga, 1 time missaa qamuteralattarpugut Ilulissaniit. Kisimiikkaangama sivikinnerusinnaasarpoq. Nukissaninnarisarpara eqqissinaralugulu pinngortitaq. Pingaartittarpara sumiissusersiut nassarnissaa tamussiussassamerngillu. Sikumi puisit alluliai takuneqarsinnaasarput.
Vores hytte
Aasaanerani najornerusarparput, aalisarluta, paarnartarlutalu. Mamarisatsinnik ingasarpugut, ilaquttat ilagalugit nuannisaqatigiittarpugut. Ukiukkut aputeqarluaraangat qamuteralannik illuaqqiartarpugut. Ammassannik nammineq juunimi panertitsisarpugut. Siornatigut ammassaat kingusinnerusukkut takkuttarnikuupput. Silarlorujussuarnerup kingunerisaanik umiatsiap kisaa kittorarnikuuvoq. Sila eqqarsaatigissagaanni qulisimanerulernikuuvoq naattorsoruminaallisarluni allanngorartalernikuummat.
Qullissani illorput
Taamanikkut piorsarnikkut atortutigullu siuarsimasuuvoq. 1300-ut missaani inoqarnikuuvoq aamarutissarpassuaqarluni. Qullissat qimappara ukioq 1961-mi qulaaluanik ukioqarlunga. Inuerukkiartornikuuvoq, 1972-imilu Qullissat matuvoq. 1950-ip nalaani tassaarsuaqarsimavoq, illoqarfimmut annerusumik kinguneqarnikuunngilaq. Illorpassuit sequminnikuupput, 90-kkunni tassaarsuup kingorna. Massakkut peqatigiiffeqalernikuummat 1987-kkunni illorpassuit kusatsikkiartornikuupput. Piorsarnissaa siunissaqarpoq.
Biilinik aqqartarfik Oqaatsunut, aamma qimussit aqqutigisarpaat
Qimmit aqqartarfiginikuuaat, aamma imaq ulinnganerani aqqarfigineqartarpoq biilinik. Qimussit imaq qanorikkaluaraangat aqqarfingisarpaat. Massakkut tamakkua pissutsit oqaluttuaannanngornikuupput. Qanga imaq sikusarnikuugami issussuumik, massakkut qaqutikkut annertunngikkaluamik sikusarpoq, qangatullu ikkunnaarnikuulluni.
Oqaatsunut biilerneq
Ukiumi nuliaralu Ilulissaniit Oqaatsunut biilinik ingerlanikuuvugut utersarluta. Oqaluffik Zionip eqqaatigut aqqarluta sikukkut ingerlaarnikuuvugut. Siku issusoorsuusarnikuungami manissuullunilu aqqutigiuminartarpoq. 15min missanani ingerlavugut. 1987 nalaani pivoq. Kingorna sikulaartaraluarpoq kisianni sikorpiassaarnikuuvoq. Massakkut umiatsiamik Oqaatsunukartarpugut. Ukiukkullu imaq sikusimangaangat qamuteralannik ikaartoqarsinnaasarluni.
Ukiukkut qilaluarniarneq
Imaq Diskop tungaanut sikusarallarmat qimmillit aalisartullu sassisarpungut. Nammineq qimmigut atorlugit qimussertarpugut tupermik ikumasartullu nassarluta. Ilaannikkut unnuisarpugut, pisaqarluarsimangaangattalu ulluinnarlugu. Aallaasinik piniartarpugut, pisaqarsimanermi qimmit atorlugit qaqinneqartarput. Tupiliortarpugut qamutit marluk sanileriiserialugit. Kingorna biilinik aamma sassiartut orninnikuuagut. 2000 missaaniit siku allanngornikooqaaq, sikussaarnikuuvoq siullermituut.
Qimussimik aalisariarneq
Inuusuttuaraangallarama qimussimik aalisariarfingisarparput. Inuusuttut utoqqaallu peqatigisarpagut, utoqqarnillu pinialunnermik ilinniartinneqartarpugut. Qaleralinniartilluta ullup ilatsiarsua siku putuniarsarisarparput. Fabrikkimut tunisarpagut uatsinnullu nerisassaqartittarluta. Assorsuaq nukimmik tunisisarpoq qimminut atassuteqarluarneq. Sermersuup nungukkiartupiloorsimanera malunnarpoq. Sermeq ilorpaallannikuuvoq assorujuk Iluliarujussuit millinikuupput. Taamani qamuteralaqanngilaq.
Aalisarneq
Umiatsiamik Poca 600-mik , pingasuukkajuppugut ernera ueralu qaleralinniartarpugut. Taqualaartarpugut annikittumik, ningittakkat baaliallu nassartarlungit. Ullaaralaakkut amuariartarpugut, qalerallit Royalimut tuneriarlugit neqitsersoqqeriarluta avalaqqittarpungut. Nammassinermi neqitsersoqqeriarluta aqagumut atungassat piareersartarpagut. Ullut tamangajaasa aalisartarpugut. Ukiuni kingullerni qalerallit ikiliartorneri malunnarpoq.
Anaanakkuma illuat
Attumut tikikkaangatta isumangineqarluta ilaqutamaarluta iluarusuttarpugut. Anaanakkut, qatanngutit soralussallu kateriffipput. Kinaassutsigut tamakkiisumik saqqummertarput. Kalaaliminertuuttarpugut ingaasariartarlutalu. Kalaalimerngit pingaartittorujuuagut. Misiginartarpoq suna tamarmi Attumi kalaalimerngit pissarsiarisinnaallugit. Nuna qerijuaannarnikoq aakkiartornerata kingunerisaanik malunniutinik malugisaqarnikuunngilanga.
Pisuttuarneq
Sukkulluunniit pisuttuartarpunga, nukissanik aallerfingisarakku. Ilaannikkut ernera ilangalugu pisuttarpugut Sermermiunut, avatangiisaa, iluliarsuit, pinngortitaq nukissamik tunisisarmat eqqissititsisarlunilu. Silap atoruminarnerani pisunnerusarpunga. Pisuttuarnerit tamaasa naapitaqalaartuaannarpunga. Eqqarsaatit qamaniittut avatangiisikkalu eqqarsaatiginerusarakkit nunap qerijuaannartup aakkiartorneranut maluginiagaqarnikunngilanga.
Aavartarfik
Augusti aallartilaarnerani aavariartarput, ilaqutaaqqakkaluunngikkaangami kammagullu. Sorpassuit nassartarput, atortussat taqussallu. Sapaatip akunnerata missaani najortarparput suliffissagut apeqqutaallutik. Assorujuk meeqqagullu pisuttarpugut, pissanganartuaannarpoq pisulluni. Kingullertigut eqallisalernikuuvugut tassani. Qaarsuni tuttup neqaa panertittarpangut. Silaannaap pissusaa eqqarsaatigingaangakku, silaannaap nillernerujuusarnera malunnarpoq. Aasarissuaq uulittarluta.
Eqalunniarneq
Meeraangallaratta majimi ilaquttakkalu kuummi nissimmik eqalunniartarpugut. Uannut isumalerujuuvoq, Siornatigut umiatsiariarluta sikukkoortarnikuuvugut eqalunniartarfimmut tuperiarluta, 1km missaa pisoqqaarluta. Inersimasunngoreeraluarluta aasaanerani taakunnartarpugut pujoorisuaannarlutalu, aasarluaraangallu aavarfingisarlugu. Massakkut inersimasunngoreerluta sikoqarnerluunniit ajorpoq. Piffimmi massakkut suami sikoqarpoq, siornatigut siku angisoorujuusarnikuungami nunguusannikuuvoq.
Pilersuisoq
Oqaattuniippoq Pilersuisoq. Pisiniartarpugut arlaannik illuaqqiaataa, nioqqutissat ilulissani pigineqanngittut pilersuisumi pisiarisarpagut. Nuannarisuaannarparput taanna pisiniarfik. Pisiniarfiup pisiassaatai soqutiginartaramik kalaalerpaluttarlutillu. Alakkartuaannarparput. Ukiut tamaasa aasakkuunerusoq ornittarparput aasakkuuneruvoq. Nunap qerijuaannartup aakkiartornerata kingunerisaanik allannguutinik malunginiaqarnikuunngilanga.
Bedstemors grav
Piffissaqaleraangatta meeqqakkalu nalliuttuniunerusoq alakkartarparput, tussiarfigisarlugu. Massakkut naammangiinnartarparput naneruut ingalaap saavanut ikillugu, aamma naammattarpoq. Qeqertarsuarmi aananga ilaqutaqarami, taamaammat tulluartinnikuuarput Qeqertarsuup sioraanik ilerra kusassaasissasoq. Nunap qerijuaannartup eqqarsaatigissangaanni sunniutaani malungisinnaasara kisimi una eqqaarusunneruara aputikillerujunnikuunera, siornatigut aperujuttarnikuugami. Ilerra kiviartunngikkaluarpoq.
Havn
Amutsiviup nalaani tikittarfeqarpugut aaliangersimasumik, kammalaatitta umiatsiaanik tikittarpugut. Nassakkajuppagut atisassamaatit, nerisassamininnguit aqqutaani nerisassagut. Sioqqanik angerlaassinikuuvugut, Qeqertarsuup siorai immikkuullarissuummata kusanartut, aanamma ilerranut ilisassanik. Nunap qerijuaannartup aakkiartornerata kingunerisaanik annerusumik malugisaqarnikuunngilanga tikipparneq ajorakku. Eqaammasarparali ulerujussuarnikoq sissa.
Blue Cafe
Meeqqakkalu cafeertarpugut anaanamma angaava cafémi sulisarami. Nerisinneqartarpugut iluarisatsinnik. Ilaquttagut cafémi naapinnerusarpagut takukulanngikkaluarlugit. Sivikittuaqqamik najortarparput isersimaarujoorluta, eqqissisimaarfingilaartarlugulu. Tikeqqammilluni iluartarnermik eqqissisimaarfissaqarluni. Nunap qerijuaannartup aakkiartornerata kingunerisaanik allannguutinik eqqaasassaqanngilanga.
Foldboldbanen
Meeqqat unammiarlutik arsariartut isiginnaariartapakka tapersersuiartuutaa. Akuttungaluamik tikittarpara aasakkuunerusorli. Qeqertarsuaq qaammatialuit najugaqarfiginikuuarput angajoqqaakkalu. Arsaaffiup eqqaani sioqqat qernertuni aneertarpugut sisseriutaa. Qeqertarsuup siorai immikkuullarissuungamik. Umiatsiamik tikittarparput. Takornariarpaaloqartarpoq. Aasaanerani kisimi najornerusarpara. Allannguutaasinnaasunik nunap qerijuaannartumut tunngatillugu eqqaasassaqanngilanga.
Vores hytte
Ataatamma 2006-imi sananikuuaa. Aasakkuunerusoq illuaqqamiittarpugut nuannisaariarluta, paarnatarluta, uilortarniarlutalu. Aalisarsimangaangamik ammassisimangaangamillu aamma ingasarlugit. Angajoqqaakka meeqqakkalu ilagisarpakka, ilaannikkut kammalaatigut ilagalugisarlugit. Angajoqqaama aasaanerani weekend tamangajaasa illuaraq najortarpaat. Illuaqqap qulaani kuuk kuussuaartarnikuuvoq illuaqqap nalaanut ulorianarluni angusarmagu, massakkut suami kuutttarpoq. Illuaraq ungaluusaqalernikuuvoq.
Fodboldbanen
Meeqqat arsartut, ilaannikkullu nammineq peqatigisarpakka. Meeqqakka timersortuummata piffik annertooq silami arsariartitsisarpunga peqatingisarlugillu. Aasakkut arpanneq meeqqat soqutigisarigamikku, silamiingaatsiartarput. Nunap qerijuaannartup aakkiartornerata kingunerisaata malunnarneranik eqqaasassaqanngilanga.
Hallen
Haalimi meeqqat silarsuaralugit timersortut peqatigisarpakka. Kaammattungassat kaammattorlugit, arlaannik ajutoortoqaraangat ikiuuttarlunga. Angajoqqaatut akisussaaffeqaqataallunga. Piffissaq annertooq haalimiittarpunga ullup ilatsiarsua, nuannarivara eqqissisimanaralugulu, meeqqanut akuuneq ikiuunneq soqutingisarigakku. Ukiuunerani piffissaq annertooq haalimiittarpunga. Nunap qerijuaannartup aakkiartorata kingunerisaanik sunniuteqarneranut maluginiarnikuunngilara.
Ilulissat Icefjord Center
The Icefjord Centre is a modern visitor hub by Greenland’s Ilulissat Icefjord. Its exhibitions explore ice, climate change, and Inuit culture, while panoramic views connect visitors directly to one of the Arctic’s most dramatic glacier landscapes.
Inoqarfitoqaq Sermermiut
Sermermiut uannut pingaarutilerijuungami aamma suliffinga aqqutigalugu, ingammik aamma takornaleriasuulluni. Inoqarfiusimanera takussutissaqarluarpoq. Tassanimi nunami iviit inoqarfiusimatillungu naasartut piupput. Sila apeqqutaatillugu ornittarparput. Sammisassat apeqqutaatillugit takananiikkajuppunga. Nuna qerijuaannartoq aakkiartornerani nunataa qulloorpoq sissarpiamilu nakkaasoqarluni. Kulturit assigiinngitsut ersariinnarmik qaleririiaallutik takussutissaat takuneqarsinnaapput.
